中環出更：陳思靜過關等9個鐘 批港檢疫太「流」
內地近日收緊港人入境政策，港人要持有二十四小時內嘅病毒檢測先可以入境，元朗前區議員陳思靜趕搭七十二小時檢疫嘅尾班車，日前拎左核酸檢查批准返內地處理文書事務。點知陳係深圳灣口岸等過關都等咗九個鐘啊，返到酒店仲要無飯食，究竟點解咁辛苦呢？
正所謂「過五關，斬六將」，經深圳灣去內地都要過四關，分別係交檢測報告、填寫分流表、見醫生，同埋過海關。陳指在場至少有二、三千人，打蛇餅打到出關口出面，陳形容企到腰骨都痛，係去到之後等酒店巴士嗰陣先有得坐下，但都企咗六個幾鐘。
由於陳被安排入住嘅酒店比較偏遠，所以佢都等咗兩個鐘接駁車，連套戲都睇完喇！
內地政府要求嚴格
酒店畀住客嗌指定餐廳嘅外賣，但係陳安頓好已經夜晚十點幾，過咗點餐時間無嘢食，而陳當日淨係食咗午餐，陳惟有「算啦，當減肥！」陳話內地政府要求嚴格，佢除咗係香港接受病毒檢測，過關時同埋到達酒店後都有醫生為佢再收取樣本。陳批評香港疫情大爆發嘅原因係政府入境要求太「流」，只要係港人都只需要十四日家居隔離，非常容易造成社區感染，再係咁懶懶閒經濟遲早頂唔住喇！
卓妮