中環出更：斜槓族夠自由 伍婉婷體驗多元人生
搵一份固定嘅職業，係好多畢業生嘅目標，但隨着工作模式嘅改變，投身高自由度嘅「斜槓族」亦都係一個出路。文化力量秘書長伍婉婷（Yolanda）指出，可以多方嘗試感興趣嘅工作以體驗多元人生，係斜槓族引人入勝之處。而佢踏足社會就同時間擔任幾份工作，可謂一早就開啟斜槓生涯。
斜槓族呢個名係源於符號「/」，意指具有不止一種工作或專長嘅自由工作者。Yolanda話投身斜槓生涯，從事嘅工作通常都需要掌握一定嘅技能或知識，同唔計較專長嘅散工係有好大分別，因此斜槓族不能視為「炒散」。佢話認識一位擁有教師資格嘅朋友，曾到青年中心教攝影、繪畫、木工，真係周身刀，張張利。可以想像，要過斜槓族生涯，真係要博學多才至得。Yolanda又話斜槓族雖然係自由身，但本質上都係自僱人士，所以要過斜槓生涯就必須自律性強，以及理財能力高，同人家討論合作協議時亦要睇清楚條款以保障自己。
國際青年商會數碼轉型委員會委員譚麗時（Angel）就指網路經濟興起，造就機會予斜槓族發揮所長。佢話營運一個社交平台，需刊登旅遊、飲食、化妝、嬰兒用品等各類題材嘅文章，而來自唔同背景嘅各路斜槓族，就自己所熟悉或關心嘅範疇來撰稿，文章內容自然會入木三分。Angel又認為廣大嘅斜槓族不但各擅勝長，兼且具有相當嘅人脈，往往可以為企業提供新創見，因此營商者搵斜槓族幫手，唔可以視為一般嘅僱傭關係，反而較似係一種合作模式。
張益麟擬建合作平台
香港青年工業家協會常務副會長張益麟（Alan），就話過去謀生需講求一技之長，然而互聯網提供大量資訊之下，造就年輕一代廣闊嘅知識層面，並萌起唔想焗限於單一工作嘅潮流。有見斜槓族將會係未來嘅商業模式，Alan正建構撮合傳統企業同斜槓族嘅平台，推動兩者合作互利，發揮共享價值。
卓妮