政情：「街市有貓」論捱轟 任國棟道歉
疫情擴散，近日喺紅磡街市發現確診個案。九龍城區議員任國棟日前喺香港大學微生物學系講座教授袁國勇巡視紅磡市政街市時，同教授講街市入面有貓，引起了公眾關注街市內嘅貓隻安危，仲畀人鬧爆係想將貓趕盡殺絕添！任國棟前晚喺社交平台發聲明道歉，承認自己喺愛護動物方面嘅意識不足，已去信要求食環署尊重貓隻生命。
澄清絕無意趕盡殺絕
任話睇到網友嘅留言，明白到大家都好愛護動物，而佢自己都一樣，認同動物都有其生存權利，必須受到尊重同善待。
佢又承認有關言論過分執着提醒袁國勇街市內曾出現貓隻，畀人誤解做要對貓隻趕盡殺絕，佢澄清絕無此意，都從未要求食環署捉貓。
跟住佢又話已去信食環署，要求容許店主進入街市，將貓帶返屋企，或者畀義工進入街市將貓帶走暫託，街市重開後再貓歸原主，同時亦要求該署尊重貓隻嘅生命。