中環出更：落區送暖 長者以為搓手液用嚟飲 黃占永好擔心
以前大家可以同親友隨時見面，但疫情之下所有嘢都唔係理所當然，而喺呢段非常時期，唔止喚醒大家珍惜生命同珍惜身邊人，仲見到有好多弱勢社群生活艱難，需要特別關顧。
紫荊青年商會日前喺網上舉辦「紫繫香港愛同行」閉幕禮同分享會，好多義工都喺網上分享佢哋落區派防疫物品嘅感受。其中經營衞生及消毒品牌嘅執行董事黃占永（Rambo）話以往都有去安老院舍作探訪活動，但就係第一次落區派物資。佢話遇到一位婆婆以為派發嘅酒精搓手液係用嚟飲用，即刻令Rambo好擔心長者可能睇唔清楚使用指引，於是好有耐心咁同每位公公婆婆講解防疫物資嘅注意事項。
甄倩儀冀建社區關愛文化
嘩！好彩Rambo同啲長者解釋多啲，否則好可能出意外。紫荊青年商會副會長符凱淇（Gaby）同意做社區服務固然係好事，但要設身處地咁企喺其他人嘅角度諗。Gaby話即使手上收集到好多物資，唔係派晒出去就完成任務，每個人諗多少少，關心多啲服務使用者，相信成件事就會事半功倍。
呢次活動主要係連繫唔同義工落區派發防疫物資。紫荊青年商會會長甄倩儀（Natalie）話近年香港社會氣氛沉重，更加出現對立情況。Natalie話喺疫情下出現好多物資分配不均情況，所以希望可以出一分力建立社區關愛文化，決定帶頭凝聚唔同義工同機構，進行咗十二次社區派發物資活動。佢話最初完成第一次服務後，都好擔心有無足夠資源維持服務，但好彩接獲好多義工同機構主動幫忙，覺得香港人好有愛心。
國際青年商會香港總會會長鄭永翔亦喺網上話，喺今次活動見到咁多義工整抗疫包，自己深受感動，而義工落區派物資，亦將正能量帶到社區，好值得支持。
卓妮