中環出更：校內活動全暫停 馬逢國：康體界瀕死
第三波疫情持續，康樂場地短暫重開後一直關閉，體育、演藝、文化及出版界議員馬逢國就形容，業界工作者過去半年情況惡劣，已到瀕死狀態，繼早前康文署取消各項活動後，教育局再宣布開學後暫停所有校內活動，對相關工作者可以話係雪上加霜，佢批評政府作任何決策前，完全冇諗過連帶嘅後果。
斥政策顧頭唔顧尾
唔少行業受疫情衝擊影響極大，馬逢國話啲業界工作者原本都勉強捱得住，一心諗住暑假結束後，學校開學會有番啲生意。點知受到一浪接一浪嘅打擊，康文署早前宣布取消九月份舉行嘅康體活動，圖書館活動同受影響。而教育局雖然宣布學校如期開學，但所有校內活動都要暫停，如此一來，康體、音樂老師等受到直接打擊。
馬逢國直斥政府推出政策時，冇清楚諗過帶嚟嘅一連串後果，只係做一樣嘢，又唔做埋另一樣嘢，教育局及民政事務局對業界工作者置之不理，冇任何輔助措施，雖然政府早前推出兩輪基金支援，但只得七千五百元，試問又點捱過呢半年，仲要未計有啲自僱人士完全冇受惠，佢慨嘆業界要捱幾耐仲係未知之數，希望政府真係認真諗諗喇。
卓妮