政情：選舉開支冇得報銷 公民黨莫財急撲水
政府早前宣布將原定九月舉行嘅立法會選舉延遲至下年，同時又表明被裁定提名無效者（DQ），可能不獲發還選舉開支。另外，參加民主派初選嘅人士其選舉開支亦未必獲發還。而十二名遭DQ嘅民主派參選人當中，就有四位係公民黨（公文袋）成員，當中包括鄭達鴻、楊岳橋、郭家麒及郭榮鏗。該黨主席梁家傑就話，據各選舉團隊匯報，已花費至少三百萬元於選舉工程上，不獲發還選舉開支可能令該黨觸發財政危機，依家積極諗緊解決方法。
受重創 唔排除減地區議辦裁員
梁家傑提到，雖然未就各參選人嘅初選選舉開支作最終結算，但初步計算，暫時知道選舉工程耗費至少三百萬元，但四人中邊個用得最多錢，佢就話真係唔知，要進一步去統計，不過就承認今次可能會令該黨面臨財政危機，形容係一個氹，現時都好頭痛，要諗吓點填筆數。
佢又話，嚟緊將研究法律理據及資源，決定是否採取進一步行動，該黨目前只有眾籌所募得嘅百幾萬元，但其實黨內一年基本開支都達五百萬元，至於未來會否要節流，減省地區議辦及人手等，佢就話唔排除呢個可能，該黨嘅資源因DQ一事而耗損，影響一定有。睇嚟今次公民袋真係受到重創穿晒窿，都唔知點收科。
另外，被DQ嘅十二人當中，亦有多名獨立參選區議員，包括袁嘉蔚、梁晃維、岑敖暉，其中參選港島嘅中西區區議員梁晃維就坦言，花費至少十多萬元用作選舉工程，不過幸好早前發起眾籌，可補助差唔多一半開支，另一半就預計要自己填數。
嫌成本高 梁晃維稱或放棄拗數
梁晃維話根據以往經驗，雖然被DQ者無法取回選舉開支係意料之內，但批評做法不公，因為無論最後能否參選，佢哋都的而且確為選舉努力，政府既然話會為選舉開支埋單，就要幫佢哋畀埋。咁會唔會有咩後續行動？佢就話未必啦，因為成本同效益不成正比咁話。
梁家傑楊岳橋密會美駐港總領事
至尋日下午，美國駐港澳總領事館總領事史墨客到訪梁家傑位於中環嘅律師樓，當時黨魁楊岳橋都有出席，雙方會面超過一個半小時，雖然梁事後強調，今次會面只係作恒常交流，仲話係數星期前約定，並非因DQ事件先至約見對方，但喺呢個敏感時刻密會，實在惹人遐想，唔通窮途末路，又要向美國求助？