中環出更：企業資助不足 謝海發：止血還須控疫
憑着靈活嘅頭腦，香港生意人過去都渡過唔少難關，不過今次嘅世紀疫情就真係棘手好多啦。以經營餐廳為本業嘅香港青年創業家總商會主席謝海發認為，第三波疫情較之前兩次更難捱。雖則話餐飲外賣可以避過堂食嘅限制，但對於酒樓或者西餐扒房等食肆就未必適用。謝海發話見過有行家索性為食客提供上門烹煮嘅服務，但可惜平均一個禮拜只得一單生意！
謝海發話食肆外賣其實只能夠彌補部分嘅生意額，飲食業要止血，還需疫情盡快受控。然而政府有部分抗疫措施實在令人費解，譬如政府要求全日禁止堂食，但就開放社區中心予打工仔用膳，咁就同食客喺甲餐廳購買便當，然後走去乙餐廳享用，又有咩分別呢？謝海發指上個月尾收集百多位青年創業家嘅意見，當中逾半都認為首兩輪防疫抗疫基金資助金額不足、範圍唔夠廣泛，大部分人都希望保就業計劃能延長至九個月，而佢就覺得業主減租可紓緩中小企嘅經營壓力，政府亦應帶頭寬減旗下物業嘅租金，以免倒閉潮惡化。
除咗飲食業，零售業亦不景，經營國貨公司嘅僱員再培訓局主席余鵬春話，以往好依靠個人遊旅客做生意，但因應反修例事件同肺炎疫情，只可以轉為針對本地客。但最近政府收緊防疫措施禁止晚市堂食，余鵬春話佐敦道分店尤其因為人流疏落，生意最受打擊。店舖惟有縮短營業時間慳番成本，同埋靠網上銷售自救，但都唔可能彌補生意損失。余鵬春話香港經濟短期內都唔會復甦，期望盡快有疫苗面世咁話。
張耀成指電腦熱銷屬曇花一現
市況大吹淡風，但電腦銷售可能係一個例外。香港電腦商會創會會長張耀成指，近來多咗人選擇居家工作同網上教學，帶動電腦及其相關產品嘅需求，三月至四月份嘅銷情都算理想，但隨着疫情困擾愈見漫長，最終都會妨礙到大眾嘅消費意欲。
卓妮