政情：上討論區落伍變異類 鄧振強自覺「左膠」
一九八二年開始執教鞭嘅中學校長會主席鄧振強，雖然一個月後就要退休，但佢仍然好關心年輕人嘅想法，曾透過網上討論區去了解社會發生咩事，不過喺討論當中佢覺得自己好似異類之餘，仲係一個「左膠」添。
鄧振強尋日接受電台訪問時，指自己喺舊年六至十一月開設咗個網上討論區帳戶，佢話網民激進嘅討論，令佢發覺自己係一個「左膠」，可能已被年輕人視為建制嘅一部分，阻礙發展。佢仲提及，現時部分官員期望透過第三者包括校長，去了解年輕人，呢個情況並唔理想，因為佢自己都喺學習過程，仲可能已係學生眼中嘅落伍分子，認為當局應該面對面與年輕人溝通。
指部分中學生有港獨意識
鄧振強話，喺中學呢個基礎教育中，維持自由及開放嘅校園環境相當重要，畀學生可以喺冇恐懼情況下將自己嘅疑惑同老師分享。不過佢都承認部分中學生有港獨意識，但只屬於少數。對於外界指控學校以政治動員鼓吹學生抗爭，就話純屬誤解。