政情：染疫入院 部門欠溝通 何民傑淪「失蹤貨物」
疫情大爆發，前區議員何民傑亦於主持電台節目期間，不幸中招。雖然已經入院治療，但何民傑話自己好似一件唔知拋咗去邊嘅貨物咁，點解佢會咁講呢？
早前何民傑同電台執行總監程凱欣一齊主持節目，後來兩人都確診染上新冠肺炎。何雖然喺七月廿八日入院，但依然有政府部門打電話畀佢，以為佢仍然身處隔離中心，何形容部門之間好似「唔知件貨拋咗去邊」，不過佢話醫院照顧都算完善嘅。何又話住院連日來，自己反覆發低燒，個人比較攰，好多時候都乖乖哋留喺病床上睇新聞，佢話呢排好多大新聞要追，免得出院之後唔知個世界發生咩事。
慶幸屋企人檢測陰性
何民傑又話好彩屋企人檢測結果都係陰性，佢話日後會更加注重個人衞生，提高防疫警覺，例如喺電台主持節目嗰陣避免除口罩飲水，亦會戴上手套，始終電台空間比較封閉要小心為上。何話已經取消晒嚟緊嘅工作，主要任務係要安心休養，等康復後再重新啟航。