政情：傳遭滙豐關閉戶口 陳智思：僅持該銀行信用卡
繼早前遭美資銀行取消戶口，前晚又有消息傳出，指行政會議召集人陳智思於滙豐銀行嘅戶口已被關閉。不過陳智思回覆傳媒查詢時表示，佢並無滙豐銀行嘅戶口，不過滙豐信用卡就有一張，可以如常使用，未受影響咁話。
已被美資銀行關帳戶
關閉戶口嘅消息，係美國共和黨海外事務組織副主席俞懷松(Solomon Yue)喺前晚，於社交平台指出滙豐已關閉陳智思嘅銀行帳戶，並揚言陸續會有更多戶口被關。但係陳智思就否認呢個講法，又話自己喺滙豐銀行冇戶口。其實英國傳媒早前亦有類似嘅傳聞，指陳智思遭一間美資銀行關閉其帳戶並退還存款。佢當時拒絕透露係邊間銀行，但指香港其他官員亦遇到類似問題。