中環出更：買現成西裝 馬仁威：提醒自己保持身材
早前有社交名人喺網絡貼出自己嘅西裝照，儘管西裝係意大利貨，但仍惹來大量負評。M體育會名譽主席馬仁威（Kelvin）指，意大利西裝因着重剪裁，睇落特別帥氣，但若果男士過肥、太矮或肩背肌不足，咁就無論套意大利西裝係邊個品牌，恐怕都好難Carry得起喇。
其實講到尾，着西裝要避免出現「穿起龍袍唔似太子」之感，最緊要係有好身材。Kelvin話唔主張搵裁縫做西裝，因為一個人無論肥瘦，度身訂造必然稱身，久而久之就會忽略自己嘅身形變化。反而購買現成西裝，為咗迎合着開嘅尺碼，就會時刻提醒自己要保持身材。不過無論點樣Keep，一個人嘅外貌同身形曲線都會隨着年齡而改變，因此購買現成西裝，必須留意時裝品牌嘅銷售對象，譬如着眼於年輕人嘅品牌，其西裝風格就未必適合成熟嘅男士。
傑出企業公民協會主席趙彼得（Peter）就指衣領係視覺上最為矚目之處，所以着西裝，恤衫都係重要一環。佢話可以敞開衣領的話，佢會選擇穿着「燕子領」恤衫。講起恤衫衣領，Peter憶起多年前，一種名為「Button Down Callor」嘅設計曾流行一時，惟領嘴鈕多採塑膠材質，難以置身高貴場合。至於袖口鈕，實用性雖然唔高，但仍然係紳士裝扮嘅重要配件。Peter話西裝嘅潮流變化看似不大，來來去去都係得幾道板斧，但只要喺細節上花啲心思，男士着西裝亦可顯露其個人氣派。
西裝雖然係男士衣物，然而女士穿着西裝亦往往流露另一種韻味。中華廠商聯合會青年委員會委員徐詠琳（Jennifer），指現成西裝嘅剪裁多按男士身形，女士要着得到稱身嘅西裝，只有盡量試多幾間時裝品牌。
徐詠琳：衣着要襯番膚色
Jennifer話除咗剪裁同布料，西裝嘅顏色都好重要，譬如紅色或淺藍嘅西裝既新潮又奪目，但如果同膚色唔相襯的話，着上身好容易會出事o架。
卓妮