政情：公屋輪候時間 任內翻倍 黃遠輝卸職感言：對唔住
房屋委員會資助房屋小組委員會昨日開會，即將喺下月卸任主席一職嘅黃遠輝，喺主持完相信係佢任期內最後一次會議後，就同傳媒分享佢嘅離別感言。佢首先感謝傳媒一路以嚟對佢嘅支持，但之後就向市民講「對唔住」，因為公屋平均輪候時間喺佢任內長咗一倍！
做咗8年超限期 惟有離開
黃遠輝重提自己喺二○一二年啱啱加入小組嘅時候，市民平均要等二點七年先上到樓，但到咗八年後嘅今日，平均輪候時間就延長到五點四年，慨嘆自己扭轉唔到不斷惡化嘅情況。佢仲講到，其實自己唔願意喺呢個情況下離開，但政府公職有六年大限，自己已經做咗八年，惟有將相關工作交託畀小組其他成員。
查實人稱「公職王」嘅佢亦曾經做過土地供應專責小組主席，佢話已盡咗好多力，想搵多啲土地增加公營房屋供應，希望改善依家住喺劏房嘅低收入家庭嘅生活。到咗最後，佢就同傳媒同市民講「再見」，提到英文係「See you」，仲話希望下次可以再見番大家嘅親切笑容添！