中環出更：創科專才作曲擺上網 散播正能量
新冠肺炎疫情持續影響本港，近日有唔少活動都需要改以網上形式進行。之不過，相信呢樣嘢就難唔倒有好多科技界專才嘅香港創科發展協會，佢哋日前就喺社交網頁上慶祝成立兩周年，協會主席陳迪源（Leonard）仲同常務會長李煥明（Wendy）、執行會長彭子傑創作咗一首名為《無限可能》嘅歌曲，希望透過呢首歌為業界同市民帶嚟正能量，即使面對疫境都要保持正面嘅心態添！
呢首歌係Leonard同彭子傑一齊填詞嘅。Leonard話香港人從來都唔缺乏創新思維，但就覺得無論有幾好嘅創意，都需要有個舞台畀佢哋發揮，仲提到大家都唔會知道疫情幾時先會結束，但社會進步唔可以停頓，強調唔可以因為疫情放棄一啲重要嘅事。佢仲話希望大家都可以有呢一份信念，無論有乜嘢阻礙都要將事情完成。
負責作曲嘅Wendy就希望歌曲可以為大家帶嚟正能量。佢話雖然喺疫情之下，大家可能會同唔到親戚朋友見面，亦可能有好多計劃因而停頓，但都應該保持正面嘅心態，善用依家留喺屋企嘅時間認識自己，甚至可以學習創新同資訊科技知識增值自己，做好準備迎接未來嘅機會。
任景信：以科技造福社會
作為主講嘉賓嘅數碼港行政總裁任景信係主講嘉賓之一，佢話唔少本土初創企業都希望可以運用科技，設計唔同嘅解決方案應對疫情下嘅需要，以科技造福社會。
另一主講者、政府資訊科技總監林偉喬就話，雖然新冠肺炎對本港經濟、民生帶來好大影響，但科技喺疫情下扮演重要角色，提到政府同業界聯手推出咗互動地圖，同透過Telegram方便市民掌握疫情，佢仲話科技可以幫各行各業創造商機添！
卓妮