政情：議辦作初選票站 被扣整月開支 泛民區議員聯署拗數
早前有團體舉辦罷工罷課公投同埋民主派初選，好多泛民區議員都將自己嘅辦事處（議辦）用作投票站。有區議員收到通知，話民政事務總署會扣起整個月嘅營運開支，認為做法不合理，決定搞聯署反對。
面對民政總署話唔處理啲營運開支，五位有份籌辦票站嘅區議員最近就發起聯署，鬧爆做法唔合理，要求政府發還營運開支，其中屯門區議員李家偉不滿政府嘅做法，話除咗投票嗰兩日，其他時間都有服務居民，包括做防疫工作，仲以工作報告舉例，指即使有內容唔符合規格，但仍會發還符合規格嗰部分，認為依家扣起咗成個月嘅營運開支係唔合理。
民政局早已警告不發還
其實政府早前已經講咗初選涉嫌違法，而民政事務局事前亦已經發新聞稿警告區議員，若違反議辦用途，有關營運開支將不獲發還。不過李家偉認為，用議辦做票站係反映民意，絕對係履行緊區議會職能。除咗聯署，佢哋會去信民政事務局同民政事務總署，要求正式交代事件。