政情：戴耀廷腦壞 妄想攬中共跳崖

何濼生批評革命陣營以非法、暴力、狡詐嘅手段推動革命，而戴耀廷引領反對派實行對北京嘅革命計劃，首先喺立法會選舉爭取過半議席，否決財政預算案令政府停擺，令政府被迫解散立法會作補選，料反對派會再取得過半議席，繼而迫使行政長官辭職。

推攬炒十部曲 話明冇諗過後果

戴耀廷預計北京會成立臨時立法會，任命新嘅行政長官，再拘捕民主派領袖等。何濼生話呢一連串計劃會造成社會動盪同經濟癱瘓，亦會令中國政府受到國際制裁。對於戴耀廷形容要「攬着中共一起跳出懸崖」，甚至話自己都想像唔到之後嘅事態發展，何濼生形容呢個企圖令人反感。何濼生話竟然有唔少人參與戴耀廷推動嘅民主派初選，對此感到沮喪。

戴耀廷同時係違法佔領行動（佔中）發起人之一，何濼生話戴當時宣揚愛與和平，當佢見到戴提出嘅「攬炒十部曲」都覺得難以置信，但依家可以確定戴係逐漸實行緊呢個計劃。何濼生覺得戴耀廷喺社會上有相當地位，應該負上一定嘅社會責任。

學者籲遠離暴力 合作取代分裂

《港區國安法》正式實施，何濼生話明白好多人抱有警惕性，但佢覺得應畀時間留意會點樣執行法例。佢話香港經歷佔中運動、反修例事件，先引致國安法實施。何認為只要香港仍然遵從基本法就唔會出現任何問題，話若果香港唔再好似以前咁蓬勃發展，中國亦唔會得到任何好處，唔會係中國希望見到嘅局面。

何濼生形容香港已變得唔一樣，香港人分成咗兩大陣營，除咗反對派，另一陣營唔支持革命，遠離暴力行為。何濼生相信大家同樣熱愛香港，希望香港變得更好，希望大家可以合作尋找出路。