中環出更：與港台割席《警訊》搵緊新拍檔

警隊同香港電台合作拍攝嘅電視節目《警訊》因雙方近年關係緊張，搞到警隊最終宣布同港台「割席」、結束長達四十七年嘅合作關係。據悉，警方最近尋找緊新嘅合作夥伴。

《警訊》節目一直秉承宣揚滅罪訊息嘅宗旨，但反修例風波期間，港台播放嘅節目多次嘲諷警隊，導致警方好不滿。警方喺今年三月亦去信港台，話《頭條新聞》顛倒是非、誤導觀眾，令觀眾對警方容易產生錯誤看法。而雙方合作嘅《警訊》將八月十二日播放最後一集。

雖然警方唔再同港台合作拍攝，但都積極搵緊新嘅合作夥伴喎。據了解，警方最近搵過幾間本地電視台，討論合作拍攝全新嘅《警訊》，聽聞幕前幕後都會有改動添。但另有消息指警方未有定案，考慮緊包括自行製作節目、搵合作等方法，所以就唔知市民幾時先有得睇喇。

卓妮