中環出更：同機美官員染疫 陳昭昭被迫延長隔離
好多國家為防範疫情傳播，要求入境人士隔離十四日。香港中山社團總會會長陳昭昭，目前正身處柬埔寨首都金邊某酒店，度過兩星期嘅強制隔離。佢話疫情之下都要出門，皆因要親赴柬埔寨處理一項重要業務，而原初就預計自己只需喺當地隔離兩日，誰知搭同一航班嘅兩位美國外交官，入境時被驗出對新冠肺炎呈陽性反應，結果牽連到包括陳昭昭在內嘅全體乘客，都要隔離十四日。
陳昭昭話現時由香港飛去柬埔寨並無直航，兜兜轉轉接近三十小時先至抵達當地。柬埔寨政府嘅入境要求都好嚴格，外國人須具備柬埔寨方面發出嘅公司信、醫療機構發出三日內嘅檢測證明、三千美元按金同購買醫療保險，柬埔寨領事館先至會發出簽證，而抵埗之後亦要做核酸檢測，隔離兩日以待結果。佢質疑同機嘅兩位美國外交官喺啟程之前並無做檢測，導致柬埔寨增加輸入個案，又連累到佢困喺酒店嘅日子，由兩日延長至兩星期，雖然陳昭昭所下榻嘅酒店，設施同服務都唔錯，不過食宿費用都係貴客自理，佢話去到結束隔離之日，嗰筆三千美元嘅按金恐怕會所餘無幾。
鄭重科逗留珠海逾4個月
不時中港兩邊走嘅香港菁英會副主席鄭重科，為免一返港就要隔離十四日，趁住公幹嘅機會索性逗留喺珠海，至今已經長達四個多月。佢話初時無諗過會留咁耐，打算疫情一告緩和就打道回府，豈料香港嘅疫情相當反覆，反而珠海呢邊嘅生活就逐漸回復正常，好多當地人已毋須戴口罩。
香港中華廠商聯合會青年委員會名譽主席王詩雅，早前靜待中港兩地互認健康碼得以落實，以便啟程前往雲南揀選原材料，然而近日香港疫情大反彈，喺未能恢復通關嘅情況下，惟有依靠內地同事寄送原材料嘅樣辦畀佢挑選。
卓妮