政情：曾用作初選票站 議辦整月營運開支被扣起
早前接連有團體舉辦罷工罷課公投及民主派初選，唔少泛民區議員將其屋邨辦事處（議辦）用作投票站，房屋署及民政政事務局喺事前已先後發信或發新聞稿警告區議員，若違反議辦用途，有關營運開支將不獲發還，甚至「不予續約或提早終止租約」，而政府更指初選涉嫌違法。初選過後，近日就有區議員接獲通知，會被扣起整個月嘅營運開支，不獲發還。
死撐符合區會職能
有區議員近日收到區議會秘書處通知，如果議辦曾經用作罷工罷課公投及初選投票站，民政事務總署唔會處理整個月嘅營運開支，即係包括議辦租金、職員薪酬、水電費、上網費等。相關區議員就批評署方做法荒謬，唔合情理，話無理由扣起晒整個月嘅議辦營運開支，更死撐初選係符合區議會職能添。
其實相關政府部門已經一早提出警告同勸喻，依家事後先嚟討價還價，會否遲咗啲呢？