中環出更：防染疫避堂食 林宣亮買便當返公司
疫情近日大反彈，感染人數不跌反升，人心惶惶。儘管政府勒令食肆不設堂食嘅禁令，目前只係適用於晚市，但唔少上班族都一改外出食晏嘅習慣，寧願留喺公司用膳以期減低中招嘅風險。
日前晏晝兩點零鐘，卓妮喺金鐘某超市，撞見潮州商會會長林宣亮，見佢一個人喺超市推住部手推車左望右望，不時又拎起啲商品嚟睇，心大心細咁，到底佢買咗乜嘢呢？佢話疫情關係，免得過都唔想出街食飯，所以咪過嚟買一個便當，返公司慢慢享用。之不過林宣亮嘅手推車裏面仲有生果、麵包同火腿喎，佢話自己揸咗車，須購物滿一定金額以減免停車場費用，加上呢啲食物都可以擺喺公司當作糧食儲備，咪兜多幾個圈睇吓仲有乜嘢啱買囉。至於毋須上班嘅日子又會點度過？佢話屋企會所有個空地，可以飲吓嘢曬吓太陽，個人都放鬆啲，但一講到下廚，佢就嘲笑自己煮飯唔掂o架，最慘係煮完要自己食番先至辛苦，所以盡量都避免自己煮飯喇。
全職煮婦 袁莎妮自覺稱職
除咗減少外出用膳，亦有上班族因居家工作，而多咗下廚嘅機會。香港總商會前總裁袁莎妮（Shirley）就喺社交平台發布咗幾張食物相，形容自己由全職CEO，變身全職煮婦，仲覺得自己好稱職添！Shirley話識整三餸一湯或者四個餸，仲可以炮製午餐飯盒，簡直做嗰樣就似嗰樣。佢又鼓勵大家齊齊加油，認為就算要留喺屋企煮飯仔或者叫外賣，都已經輕鬆過醫護人員一千萬倍，如果仲出街吃喝玩樂的話就未免太自私囉！有網友留言問佢可唔可以「黐餐」，試吓佢手勢，Shirley就話唔好喇，防疫要緊呀！
留喺屋企除咗玩吓煮飯仔，歎杯茶都不失為放鬆嘅好方法。藝術發展局副主席楊偉誠（Frankie）話，相信過去半年大家承受着好大壓力，有時心情好像過山車一樣，起跌無常。Frankie感嘆雖然無能力改變世界，但可以調節自己嘅態度，所以佢忙完一日返到屋企，就會沖泡自己心愛嘅極品鐵觀音嚟享受，一切壓力都拋到九霄雲外！
卓妮