政情：晤蓬佩奧叫對抗中國 羅冠聰涉犯國安法

蓬佩奧同英國首相約翰遜會面後，下晝先會見羅冠聰。羅冠聰話同蓬佩奧講，香港民主派初選有六十一萬人無懼白色恐怖參與投票，而中央反而計劃取消立法會參選人資格（DQ），為取消九月立法會選舉鋪路。羅呼籲國際社會必須密切關注未來兩個月嘅局勢發展，若DQ參選人，希望國際社會可以採取強硬立場回應。

唔單止唱衰香港，羅又批評中國政府打壓邊陲地區，呼籲國際社會要持續觀察新疆、西藏同香港嘅人權狀況，並向中國採取有力措施。佢又透露，喺會面期間同蓬佩奧交換對中國政府施政嘅睇法，討論未來國際社會應該點樣重塑對華政策，以彰顯民主價值。羅更表明期望未來可以繼續同美國政界有更多交流，推動國際社會強硬應對中國政府。

美制裁得把口 羅冠聰一廂情願

香港理工大學專業及持續教育學院講師陳偉強話羅一廂情願，以為自己同外國政要作出呼籲就有用。陳偉強話政治係以利益行先，中美之間牽涉好多貿易糾紛，相信美國只係口講話要制裁侵犯新疆人權嘅中國官員同企業，形容美方最近都打退堂鼓，睇唔到有任何進一步行動。

其實羅冠聰日前亦同英國官員同政要會面，促請英方加快制裁涉嫌侵犯人權嘅香港高官。陳偉強批評羅頻繁同外國官員會面，引入外國勢力對付自己嘅國家，指佢涉嫌違反港區國安法下勾結外國或者境外勢力危害國家安全罪。

陳偉強直斥羅膽大妄為，自己逃之夭夭去英國，恃住當地暫緩同香港嘅引渡協議就覺得特區政府無佢符，公然挑戰港區國安法，相信當佢踏入香港境內就會隨即被拘捕。