中環出更：貼錯確診地點 梁詠詩鞠躬道歉
本港自月初爆發新一波疫情，確診個案遍及全港各區，唔少市民都好擔心「總有一單喺左近」。東區區議員梁詠詩（Jenny）就決定喺辦事處門口貼告示，諗住提醒居民區內邊啲地方有人確診，不過，佢尋日就被人發現搞錯咗確診地點，最終要喺Facebook（Fb）上鞠躬道歉添！
誤指耀東商場有個案
話說Jenny所屬嘅筲箕灣選區近日有唔少確診個案，所以佢就決定善用自己議員辦事處門外嘅空間，張貼區內唔同確診個案嘅地點，提醒市民出入時要多加小心。之但係，Jenny就錯誤地張貼話「耀東商場」係確診地點，搞到有其他東區區議員都忍唔住喺Fb上發貼同留言指正。
知道自己擺咗烏龍嘅Jenny，就即時撕走相關告示，又喺Fb上發文更正，佢仲上載咗一張相，見到佢喺自己議辦外九十度鞠躬致歉。其實疫情資訊嘅真確性係非常重要，一旦誤傳訊息就好容易引起社會恐慌，希望Jenny以後會記得今次嘅教訓喇！
卓妮