中環出更：細時冇人伸援手朱耀中：依家盡力幫年輕人
有啲人因為受過人哋大大小小嘅幫助，所以萌起幫助其他人嘅心，而有啲人就因為自己經歷過冇人幫助嘅日子，唔想人哋好似自己咁，所以就盡力幫助其他人，而仁愛堂總理朱耀中（Torres）就係其中一位，佢幫助嘅對象仲非常特別添，係一班熱愛運動嘅年輕人。
Torres話自己年幼時甚少受人幫助，因此好明白當自己有需要時，有人伸出援手係非常溫暖嘅事。佢喺賺到第一桶金之後，就開始盡一己之力幫助別人，特別係熱愛籃球同足球嘅年輕人，Torres仲話自己細個都好鍾意打籃球，但連買對波鞋都要求父母，依家就好想幫助呢班小朋友，畀多啲資源佢哋發展所長。
從事工程設計嘅九龍樂善堂主席陳李玉佩就分享話，年輕時接受最多幫助嘅就係客人，佢回想當時，有個客人要搵設計師一連串改造幾間屋，當時好多設計師一齊競爭，希望攞到呢個工作機會，而呢個客人畀到超乎佢能力嘅信任同機會，佢唔想辜負對方嘅期望，於是不斷努力。呢次之後，陳太事業就更上一層樓，因為以前受好多人幫助，佢依家都會盡量幫人，儘管可能會冒好大風險，但佢明白有人願意畀機會嗰種心情。
陳鑑光為工人創良好工作環境
仁愛堂副主席陳鑑光（Charles）同樣係受人幫助而萌生幫人嘅心，佢喺沙士期間到依家嘅疫情，都努力幫助自己工廠工人，希望支付到人工之餘，仲畀到一個好嘅工作環境、獎勵同前途畀班員工，令佢哋工作得開心。Charles話幫到人真係好開心，因為呢啲幫助對自己而言唔算一個重大付出，但對方就會有好豐富嘅收穫。
卓妮