政情：鹹濕清潔龍 貼泳衣照遭舉報

附連結實則宣傳防登革熱

新冠肺炎疫情大爆發，唔知係咪因為咁，清潔龍都要諗諗新招吸引大家目光，提醒市民注意衞生。清潔龍貼出一張泳裝相，有個性感女郎咬住眼鏡望鏡頭。描述更寫住「我叫Aedes albopictus伊伊，我住在一個草地旁邊。要約直接見面嗎？輕輕咬你耳朵」，驚大家睇相睇字唔夠，再貼上連結，邀請大家「快看我的調皮視頻」，形容得非常誘惑。

原來清潔龍專頁唔係被黑客入侵，只要撳入連結就可以解開謎底，當中係宣傳登革熱資訊，女郎Aedes albopictus其實係白紋伊蚊嘅學名，描述係講緊白紋伊蚊嘅習性。雖然食環署呢個公關技巧夠新奇，但有網民唔太受落，之後仲懷疑因為太多人舉報貼文，Fb話內容牽涉裸露或性行為而移除貼文。

但清潔龍專頁死撐唔認錯，話張相只係特登買嘅模特兒相，佢着住泳衣唔係裸露同色情，有網民仲附和，質疑投訴者係咪着衫沖涼。講到底，啲描述又真係幾踩界，睇嚟今次真係玩大咗喇！清潔龍阿德又再貼文，話為免大家誤會或不安，以後出post有乜嘢相都會笠番清潔龍個頭同遮埋重要部位喎。