中環出更：疫境摺埋9節目 港台捱轟
香港電台（港台）因應疫情，尋日起至下周日（26日）暫停四個電台頻道晚間共九個節目，包括第一、第二、第五同普通話台，每晚十一時至翌日清晨將會聯播，而第一、第二台各有兩個節目暫停，第二台《晨光第一線》延遲兩小時，八時先播出。另外，第五台三個節目同普通話台兩個節目亦暫停。
市民在家抗疫 更需獲取資訊
港台發言人就解釋，咁做係為咗減少廣播大樓人流，同埋因應服務提供者關注作出調動，電台會繼續提供新聞及最新疫情、防疫資訊。但有關注團體就認為依家市民在家抗疫，需要更多資訊，公營廣播喺抗疫期間，更加需要維持服務，認為港台唔應該此時減節目。
公營廣播關注組召集人彭長緯就話公營廣播機構唔單止將最新訊息，準確向市民匯報，其實做一啲節目，防疫也好、精神上嘅健康都好重要，仲話可以喺雲端、網絡上處理，認為港台本身技術上應該處理得到，又擔心一旦疫情持續，港台會再縮減節目。
卓妮