中環出更：扭轉傳統銷售模式 林朝暉：建立個人形象
新冠肺炎疫情持續超過半年，大大打擊經濟，亦都改變咗市民消費嘅習慣，多咗傾向網上購物。面對環境轉變，企業都要諗吓計去吸客，北京港澳學人研究中心理事林朝暉近年一直拓展內地嘅市場，認為透過網上直播，IP（即個人形象）宣傳好重要，因為可以得到客戶嘅信任。佢話甚至會有客戶喺社交平台加佢為好友，問佢買首飾嘅意見。
近年商業社會講求突破傳統銷售模式，林話要轉型升級唔一定要用到5G或高端人工智能，反而要做好數據統計，咁先可以指導生產。從事珠寶行業嘅佢發現女性希望擁有大量珠寶款式，最好可以日日換新款添，所以佢推出珠寶換戴，畀客戶買一條首飾就可以戴埋其他同價錢嘅首飾，透過網頁上嘅點擊率順便收集客戶同差唔多年齡層朋友嘅喜好，得到數據，推廣體驗式消費，同客戶保持長期關係，咁先會得到客人信任（口架）嘛！
譚天逸以大數據營銷內衣褲
唔單止網店要搞搞新意思，就連傳統老店都開始轉型。傳統內衣褲品牌第四代傳人譚天逸（Jennifer）出席香港貿發局有關老牌企業嘅論壇時，都話要好好利用科技建立大數據，透過數據搵出主要客戶對象，從而提供更適合嘅推廣同優惠。Jennifer話一開始接手生意時以為品牌主要對象係男士，後來發現小朋友市場都慢慢發展緊。佢形容媽媽係屋企嘅CEO，負責丈夫同子女嘅一切，購物都唔例外，所以佢哋將設計多啲貨品畀媽媽呢位屋企嘅CEO，咁當媽媽幫屋企人買衫時，自己都可以買埋一份。
香港中小型企業聯合會會長麥美儀喺另一個網上論壇都話舊年嘅社會運動開始，已經令本港嘅零售同餐飲業面對好大困難，加上今年又爆發疫情，無晒遊客，市民嘅消費模式唔同晒，企業都要數碼化，轉型做網上購物喇！
卓妮