政情：議辦夠靜啱晒密會 李國麟自嘲成「反動基地」

立法會由唔同黨派組成，好多時都會各自各開黨派會議。至於專業議政嘅「反動基地」，李國麟就講笑咁話全名其實係「反對派動議策劃基地」。佢解釋，話議辦好多時得自己一個，所以比較靜，過往專業議政都喺其他成員嘅議辦開會，點知有次咁啱轉咗去佢嘅議辦開會，發現原來係冇人，久而久之近年一眾成員就索性喺佢度開會。

議助喺佐敦返工

雖然佢係功能界別議員，但點都會有議員助理啩，點解李國麟嘅議辦又會長期得自己一個呢？佢就話本身喺佐敦有議辦，班議員助理就喺佐敦返工，所以立法會就得番自己一個。佢仲講笑咁形容議辦係雜物房，事關有唔少書同文件，當中有部分係喺佢公開大學嘅辦公室搬返嚟，又有部分喺佐敦嘅議辦搬過去。至於點清理，佢話睇吓遲啲用漂書方式處理。