政情：五法案趕上尾班車 許正宇：精心炮製
第六屆立法會會期日前結束，仲有多個政府法案未趕得切通過，將要等到新一屆會期重新嚟過。不過財經事務及庫務局局長許正宇尋日就發表網誌，話財庫局趕喺今屆立法會會期結束前通過咗五個法案，好自豪咁話法案係財庫局精心炮製，只此一家喎。
形容如極速煮好五道菜
許正宇喺網誌話，加入政府呢個熱廚房差唔多三個月，形容自己就好似戴上廚師帽咁，了解到財庫局需要負責嘅「宴會」好多，其中一個就係喺立法會推動通過政府法案，又話財庫局趕喺本屆立法會會期結束前煮好了「五道菜」，即係通過咗《有限合夥基金條例草案》、《2019年強制性公積金計劃（修訂）條例草案》、《2019年稅務（修訂）（與保險有關的業務的利得稅寬減）條例草案》、《2020年保險業（修訂）條例草案》，以及《2020年保險業（修訂）（第2號）條例草案》呢五條法案。
之不過許正宇都只係擔任局長唔夠三個月，呢五條法案唔係淨係許嘅功勞，許自己都話要多謝同事嘅努力同埋其他政府同事幫手，呢啲議案先可以排喺議程上最前嘅位置。所以許都係唔好開心得太早，太得意忘形喇！遲吓新一屆立法會先係真正嘅重頭戲，仲有漫漫長路等住佢啊！