政情：立會失序 現「塔利班式恐怖主義」

議員謝偉俊話，第六屆立法會無論喺發生嘅事、程序同秩序破壞方面都屬於史無前例，唔希望下屆立法會繼續咁樣落去。佢話政治係爭取自身認為正確嘅理念、認為冇正邪之分，但就形容議會過去有「極少數塔利班式恐怖主義發生」，強調紛爭過後總需要建設，否則香港將繼續喺深淵糾纏。

兩派你死我亡 香港冇運行

同場嘅民主黨議員胡志偉就駁斥，話政府先至係「塔利班」、「有權用到盡」，又「指使」建制派議員修改《議事規則》，搞到議會失去解決社會矛盾嘅有效工具。他又引述民意調查，話過半數受訪者畀特首林鄭月娥嘅評價係零分、又對政府施政冇信心。佢質疑政府冇改善，仲話政府係有責任去修補行政同立法之間嘅關係。

至於紡織及製衣界議員鍾國斌就認為，第六屆立法會得廿幾個民主派議員已「驚濤駭浪」，如果九月選舉後，有超過三十個民主派議員當選，估計議會情況將更加嚴峻。佢強調，議會問題嘅最終解決方案就係政府同各黨派傾，如果建制派同民主派繼續「你死我亡」，香港將會「冇運行」囉。

三泛民早前曾掟臭彈臭蟲

其實立法會喺過去四年，議會的確發生咗唔少衝突，淨係今年都好幾單喇！林鄭月娥喺今年初到立法會出席行政長官答問會嘅時候，有十幾名議員因為叫囂、衝向主席台甚至掟道具而被大會主席梁君彥驅逐離場。本屆立法會內務委員會多次未能選出主席，會議內仲出現議員同保安員推撞導致受傷，搞到要送院治理。另外，三位民主派議員喺本年五月至六月期間，合共三次喺立法會大會審議《國歌條例草案》嘅過程中，喺會議廳內掟「臭彈」同「臭蟲」，搞到廳內惡臭難除，最後要換地氈同枱櫈等物件添。