中環出更：初選後縮沙 暴露 邪惡教授 本性 官媒斥戴耀廷心中有鬼

戴耀廷日前喺Facebook貼文話，未來嘅日子會休息同專注學術工作，但又話並非乜嘢都唔做，表示會同認同民主普選嘅港人走在一起，直到普選到臨香港。官媒尋日怒斥戴耀廷聲稱初選主要工作完成，其實明眼人都睇得出，繼「非法初選搞手」、前議員區諾軒、民主動力召集人趙家賢先後退出協調工作，戴耀廷亦都「縮沙」、任由「出線」嘅「攬炒分子」自生自滅。

官媒又狠批戴耀廷喺「非法初選」將「邪惡教授」嘅醜惡本性暴露無遺，話戴以「反中亂港勢力嘅軍師」自居，多次喺立法會、區議會選舉通過「配票」嘅方式，編造民意假象、操控選舉結果。文章更批評戴將港人「洗腦」，極力散播「違法達義」等扭曲嘅價值觀、煽動年輕人犯罪，實際上係「一步扣一步」奪取政權、攬炒香港！

港大前教師促解僱戴

另外，香港大學機械工程系前教師陳志煒都去信港大校務委員會主席李國章，要求解僱戴。陳早年已經退休，但指教書時都見過有同事因為行為失當而被革職，質疑點解戴唔單止行為失當，仲要有官司喺身都唔使免職，認為對以前被革職嘅同事唔公平，規矩訂立咗就要遵守，唔可以有雙重標準。陳批評港大唔解僱戴嘅原因無足夠嘅理據支持，將會影響港大身為國際知名大學嘅聲譽。

卓妮