中環出更：抗疫進補 李應生推薦飲雪耳湯
湯水喺飲食文化當中佔有重要席位，尤其是廣東人就更加鍾意煲老火湯進補。因應疫情再度大爆發，早前有團體準備一批抗疫湯包，藉住免費派發嘅機會，提醒市民除咗勤用搓手液同戴口罩外，仲可以用食療嘅方式來增強個人免疫力。
香港中藥業協會創會會長兼首席會長李應生（Tommy）話飲湯都有分四時湯水，以配合不時不食、遵循自然嘅中國文化。而佢自己平時就鍾意飲一啲溫和嘅、四季皆宜嘅湯水，譬如沙參玉竹雪耳百合湯咁，有時仲會加料，放多幾條淮山落去添，既潤肺又健脾開胃。Tommy仲話，草本植物嘅湯料煲幾耐都唔怕，但如果加咗肉嘅老火湯，煲嘅時間就唔好多過兩個鐘喇，佢話咁做反而會令身體太補、適得其反(口架)。面對依家嘅疫情，Tommy就推薦用雪耳煲湯喇，因為雪耳滋陰補肺，兼且老少咸宜，一家大細都飲得。
李世榮飲太多老火湯 尿酸過高
雖然老火湯好味又滋補，但亦要小心過猶不及。香港義工聯盟執委會委員李世榮（Stanley），過去就因為飲得太多老火湯，搞到尿酸過高，導致早兩年經常受到腳痛同關節痛嘅煎熬，真係苦不堪言啊。幸好賢內助幫佢分憂之餘又遍尋良方妙藥，磨咗啲中藥粉畀佢每朝食一羹，成個人嘅精神氣色先慢慢好番咋。儘管Stanley都好鍾意飲湯水、食內臟同燒鵝，但為咗健康都要忍吓，仲話「可能我已經食咗一世嘅quota喇」。
當日出席派發湯包活動嘅嘉賓，仲有香港註冊中醫學會慈善基金董事陳永光，同全港社區抗疫連線召集人蘇長榮。蘇長榮同好多港人一樣，由細飲湯飲到大，最愛係清補涼同淮山杞子煲雞湯，佢話咁多年都飲慣咗，只要調配適當、唔好過量對身體都係有益嘅。
卓妮