政情：關健身室 停派郵件 立會秘書處職員可在家工作
本港疫情持續蔓延，但政府未有再好似第一波疫情咁，宣布公務員可以在家工作。之不過，啱啱結束今屆會期嘅立法會宣布由尋日開始，除咗負責維持秘書處基本運作嘅職員同值勤人員外，會安排其他職員喺屋企工作，同時會實施多項防疫措施，包括暫停開放議員健身室，同埋暫停向議員派遞郵件添！
停用傳真機 改電郵交文件
立法會早前有議員助理成為確診者嘅緊密接觸者，令唔少議員同大樓使用者都人心惶惶，所以秘書處尋日就發電郵，指因應疫情最新情況，宣布實施多項防疫措施，例如暫停立法會圖書館及檔案館嘅館內服務、公共申訴辦事處嘅櫃台服務，甚至暫停向議員派遞郵件，要由議員或職員自行領取；又暫時關閉多個大樓入口、議員健身室同咖啡角等等。
查實立法會較早前亦已經實施多項防疫措施，包括禁止所有接受緊強制檢疫嘅人士進入大樓，又縮短咗大樓嘅開放時間等。至於最特別嘅，就係秘書處決定暫停使用傳真機，議員要改以電郵方式交文件。