政情：體溫檢測機附鏡頭 莫乃光憂侵犯私隱
疫情再度爆發，大家最好就乖乖地留喺屋企，少啲出去聚餐喇。議員莫乃光（Charles）日前同朋友出外用膳，見到食肆門口有部座地式嘅體溫檢測機竟然有埋鏡頭，當堂嚇咗一跳。佢質疑普通測體溫好哋哋，點解要附設鏡頭呢？佢覺得冇必要之餘，入侵性仲好強，話可能係過度收集個人資料。
Charles話明白部分食肆之所以轉用座地式嘅自動體溫檢測機，因為可以慳人手之餘，仲盡量避免員工同客人近距離接觸。但保障個人私隱同樣重要，佢話就算真係有需要用鏡頭，都應該列明收集影像嘅用途，會點樣處理有關影像等等。Charles話已經聯絡個人資料私隱專員公署，回覆話會跟進事件。Charles係第一次見呢類附設鏡頭嘅體溫檢測機，但佢從網上渠道得知，其他地方亦有呢種機器，呼籲大家要小心。
手機程式上載自拍照亦存風險
除此之外，早前有啲好流行嘅手機應用程式，上載自拍照之後可以推算相中人嘅年齡，又可以見到相中人變得後生或者變老嘅效果等等。Charles同樣擔心呢啲程式會收集肖像入侵私隱，呼籲大家唔好貪玩咁話。