政情：雷鼎鳴獲任藝術中心監督團成員
香港過去一直被視為「文化沙漠」，唔少藝術家同團體都經常批評政府政策落後，而且未能有效幫助業界。政府前日刊憲，宣布委任香港科技大學經濟系前系主任雷鼎鳴，出任香港藝術中心監督團成員，任期為三年，由今年八月一日去到二○二三年嘅七月三十一日為止。查實雷鼎鳴過去都發表過唔少「爆炸性」嘅言論，唔知道佢今次嘅加入會唔會為本港嘅藝術發展帶嚟點樣嘅新衝擊呢？
根據民政事務局嘅資料，香港藝術中心係透過推廣當代表演、視覺同錄像藝術，同埋提供藝術教育課程，致力去培育市民嘅創意同藝術能力，而呢個監督團就係中心嘅主管同行政機構，當中主席同其中三位成員由行政長官委任。政府今次委任雷鼎鳴，將會接替由一四年起、出任成員已達六年嘅唐維鐘。
過往不時發表惹火言論
查實雷鼎鳴退休後，不時都會發表惹火言論，例如月初先至呼籲想移民嘅香港人盡快離開香港，仲話咁樣可以令香港吸納更多新嘅人才添！之不過，呢個策略就未必可以運用喺培育本地藝術人才身上，唔知諗頭多多嘅雷鼎鳴入局後會點獻計呢？