中環出更：為影野生動物靚相 李秀恒出動直升機
中華廠商聯合會前會長李秀恒係攝影發燒友，喺眾多嘅攝影題材當中，佢話最喜歡「冇着衫」嘅拍攝對象，所以最符合心意者，必定係野生動物。但要拍攝野生動物嘅生活面貌就真係唔容易，除咗要有耐性，日以繼夜咁等待拍攝時機，又要掌握動物嘅生活習性，不過更重要嘅係避免對自然生態構成干擾。
李秀恒日前出席都會扶輪社嘅午餐聚會，同在座賓客分享佢最新出版嘅自然生態攝影集，當中有好多幅作品都係以雀鳥為拍攝對象。佢話為求與別不同嘅拍攝角度，不惜租用直升機由高空俯瞰拍攝，結果得出多幅以山川湖泊為背景嘅雀鳥翱翔畫面，視覺效果頗為震撼。講到高空拍攝，點解李秀恒唔使用時下流行嘅航拍機呢？原來自然保護區嚴禁航拍機進入，理由係要確保野生動物自然保護區裏面嘅生態，至於坐直升機拍攝，亦要同地面保持相當嘅高度，以免引擎聲浪干擾到動物嘅棲息。而車輛駛入保護區亦有數量限制，司機都要遵守不可響按同動物先行嘅規矩。李秀恒話既然鍾意野生動物，珍惜大自然亦屬應有之義。
都會扶輪社前社長鄭美恩（Lisa），都認為必須重視自然生態。佢話大米係港人嘅主要糧食，但係人類社會愈趨工業化，導致土壤受到污染，而後果就係農作物含有重金屬。儘管政府去年立例，要求米商提供進口大米嘅重金屬檢測報告，以保障食品安全，不過最徹底嘅做法，當然係保護自然環境啦。Lisa話環顧亞洲幾個大米生產地，柬埔寨因工業化程度較低，其出產嘅大米品質亦較優秀。
徐炳光：後生時都有玩攝影
當日出席午餐聚會嘅除咗有都會扶輪社社長徐嘉鴻、創社社長鄧錦添、綽號「螺絲大王」嘅徐炳光亦都係座上客。徐炳光大讚李秀恒攝影技巧高超，又話自己年輕嘅時候都有玩攝影，但後來太太對攝影興趣竟然較自己更濃厚，因此婚後就好少掂相機啦。
卓妮