政情：立會收埋咪兜 議員冇得「噴口水」
今屆立法會會期將於周六結束。回顧上屆會期過後，立法會就停止運作，所有議員都唔可以使用立法會大樓嘅設施，包括俗稱「咪兜」嘅咪架。喺今屆會期完結之後，立法會咪兜亦將暫停使用，甚至會收埋添。目前正值新冠肺炎疫情，其實收埋個咪兜都好嘅，費事有飛沫傳播啦。
議辦大樓設施亦暫禁用
立法會行政管理委員會早前經討論後，決定喺星期五晚會議結束，就收埋個咪兜，屆時所有傳媒嘅器材都要拎走。一眾議員不論是否競逐連任，過咗星期五都唔可以再用大樓嘅設施，連見選民或接受傳媒採訪都唔得。除咗咪兜，連喺立法會大樓嘅議員辦事處都唔畀用，確保唔會因為議員身份而對選舉造成不公平優勢。
其實呢個唔係新規例，喺上一屆立法會結束時都有出現過，當時都係撤走咪兜，同樣都係唔畀議員喺辦公室開記者會同埋做訪問，如有違規仲會發聲明同埋譴責添，相信今屆做法都係依循舊例啫。