政情：謝偉銓撞傷眼角 包住紗布返立會
今屆立法會會期將結束，仲有多項政府法案未審議，但就算議員趕住返立法會開會，都要安全至上！建築、測量、都市規劃及園境界議員謝偉銓（Tony）尋日左眼受傷包住紗布出現喺會議廳，原來佢唔小心跌傷。
愈來愈腫 去醫院檢查
Tony尋日下午喺港鐵中環站準備坐港鐵趕返立法會開會，點知落樓梯時唔小心跌倒，撞傷左邊眼角，要救護員到場檢查同包紮，認為毋須送院。但Tony返到立法會工作後冇幾耐，眼角就愈來愈腫，左眼難以睜大，就連其他議員同事都覺得佢唔係好妥。最後Tony覺得都係小心為上，去咗醫院進一步檢查，希望經過檢查後可以盡快返到立法會，避免再度流會。