政情：笑一舊雲唔識煮飯 張宇人：請教我老婆

喺民主派初選排行第七嘅民主黨（白鴿黨）議員黃碧雲（一舊雲），日前已講明唔再競逐連任，話說尋日一舊雲喺走廊同傳媒傾偈期間，飲食界議員張宇人咁啱路過，仲笑一舊雲唔識煮飯添！

唔做議員 留喺屋企對住老公

當時張宇人路過，見到一舊雲就講笑話，嚟緊一舊雲冇議員做之後會成日留喺屋企對住老公，搞到老公冇晒空間喇！一舊雲隨即反駁，話佢老公話冇軟飯食，不過有住家飯食覺得賺咗。

之後張宇人就質疑一舊雲識唔識煮飯，仲話自己食到有番咁上下身形，叫一舊雲請教吓佢老婆點煮飯。一舊雲就話自己以前都有買吓餸、煮吓飯，不過做咗議員之後就太忙喇，最遺憾就係有家人近年離世，但因為議會工作太忙，冇乜時間陪屋企人。