政情：梁志祥蔣麗芸申領職員開支居前列

劉業強領62萬元佔榜首

申領職員開支方面，議員劉業強申領嘅金額最多，有成六十二萬，係一眾議員之冠。詳閱劉業強五月份嘅申領表，佢請咗十二位職員，薪金介乎六千八百至一萬四千元，構成嘅金額似乎未至於去到六十幾萬咁多呀，但原來佢向當中四位職員發放約滿酬金，金額介乎二萬三千五百四十三元至二萬三千零四百元，約滿酬金加埋有成四十四萬元。唔知各位打工仔見到筆數，有冇即刻好想幫劉業強打工呢？

至於無意連任嘅議員梁志祥同蔣麗芸，就分別排第二位同第三位。梁志祥喺五月份申領廿四萬二千七百二十元，佢話早前適逢農曆新年向全部十二位職員發放獎金，等於出雙糧。佢話會檢視會期結束之時仲有冇錢剩，會考慮再加碼發放獎金。而蔣麗芸喺四月份申領廿三萬七千五百八十八元，雖然金額龐大，但佢指當中十五個辦事處同議助薪酬都係自資營運，不排除之後再發放獎金慰勞員工。跟住第四位係申領廿二萬二千六百七十七元嘅鄭泳舜，而第五位就係申領廿二萬一千三百三十元嘅葉建源。總結頭四位都係建制派代表，似乎出糧比較闊綽。

請最多人頭五皆泛民

有啲議員對待部分員工特別疏爽，議員張華峰喺二月份支付其中一位員工月薪七萬七千八百三十元，第二位就係李國麟喺四月份畀員工七萬五千二百七十五元月薪，第三位係陳振英四月份畀六萬六千六百六十二元，第四位係梁君彥喺一月份支付六萬五千六百元，第五位係謝偉銓五月份支付六萬三千元。總結頭五位都係嚟自功能界別。

又望望另一個排行榜，議員聘請嘅員工數目差距都好大，最少嘅只係請咗三位員工，包括畀最高月薪嘅張華峰，睇嚟要做佢嘅員工都唔容易呀。而聘請最多員工嘅係許智峯，有廿四人，不過其中七位員工係同其他民主黨成員一齊聘請，又有十三位員工係主要負責區議會事務，並無向立法會申領開支。第二同第三位分別係同屬民主黨嘅胡志偉同林卓廷，佢哋分別請咗二十同十九位職員，同樣當中七位員工係同其他黨員一齊聘請。第四位係請咗十六個員工嘅鄭松泰。而第五位由陳志全、梁耀忠同譚文豪並列，請咗十三位員工。總結頭五位都係泛民主派。