中環出更：疫患罩立會 陳淑莊議助同住家人 列直接接觸者
疫情大爆發，立法會秘書處尋日收到通知，一名喺立法會綜合大樓八樓工作嘅議員助理嘅同住家人被列為「初步確診者的密切接觸者」。據悉，該議助係公民黨（公文袋）議員陳淑莊嘅助理，該助理嘅祖父同工人早前確診，但該議助並唔係同祖父同住。而在尋日嘅會議結束後，秘書處安排清潔人員喺立法會大樓內進行霧化消毒。
已送往隔離營
公文袋議員楊岳橋回應話該名助理嘅非同住家人確診新冠肺炎，而議助嘅同住家人被列為直接接觸者，並已送往隔離營，助理冇病徵，亦已經冇返工，相關辦事處嘅職員亦冇病徵，並已全員檢驗，最快喺今日會有報告。
新民黨議員葉劉淑儀同容海恩嘅議員辦事處亦喺八樓。葉劉話自己同班職員都感到擔心，因為佢與同層其他人員共用走廊、洗手間同茶水間，又話已諮詢食物及衞生局局長陳肇始嘅意見，會進行醫學監察，即每日量度體溫，稍後亦會進行深喉唾液測試。咁會唔會影響未來選舉工作時，佢形容自己年紀大，要盡量小心。
容海恩亦擔心，話屋企有小朋友唔希望影響家人。被問到離任感言時，佢話依家任期仍未結束，感謝葉劉同新民黨，未來會喺其他崗位服務市民。葉劉就話容海恩會協助新民黨新界東競選工作。
卓妮