中環出更：東奧延期 梁繼昌憂出年都搞唔成
新冠肺炎疫情全球肆虐，仲搞到原定喺呢個時候舉行嘅東京奧運會，要延期至明年舉行。本身已經預訂好前往當地觀看賽事嘅議員梁繼昌（Kenneth）就大嘆可惜，話原本已買定賽事門票，全家總動員支持香港運動員，但就因為疫情緣故冇得睇，現時惟有寄望明年喇。
Kenneth話十二年前嘅北京奧運，當時佢就全家赴京捧場，今次東京都諗住一定要去，所以喺舊年十一月左右就開始預訂門票。佢話其實已經算遲(口架)啦，初時擔心門票售罄，點知上網睇吓發現原來仲有，於是就買咗游水、欖球決賽及排球項目，不過開幕禮就買唔到嘞！依家雖然話延遲到明年，但到時能否成功舉辦，Kenneth話不無疑慮！
至於體育、演藝、文化及出版界議員馬逢國，都有打算同業界一齊去睇東京奧運。佢話以前去過北京奧運、亞特蘭大奧運等，今次東京咁近又點可以唔去呢？至於最鍾意睇邊一項賽事，佢就話現場觀戰未必一定可以睇到心儀嘅賽事，主要係門票太搶手，要視乎邊場賽事嘅觀眾席仲未爆滿而定。其實睇奧運係欣賞各國選手盡力而為，同公平較量嘅精神，好好地享受運動競賽嘅過程，係咪冠軍都唔重要。
林健鋒：盛夏去睇好熱
商界議員林健鋒（Jeffrey）就話，上次北京奧運佢都有去，但適逢七、八月係盛夏，排隊入場真係好熱好辛苦，不過能夠一睹精彩嘅比賽，都算值得。由於佢今次無意前往東京觀賞奧運，所以影響不大。而Jeffrey嘅黨友、鄉議局主席劉業強亦同樣無打算去睇，又話上次北京奧運佢都有打算親赴現場，並透過網上代理購買賽事門票，惟代理商指所購門票必須抵達現場先至有得攞，佢覺得唔可信於是要求退票，幸好都順利拎得番筆錢。
卓妮