政情：公民講場：拒實施公僕居家工作 港府冇準則難服眾

政府宣傳都識得講，要避免疫情擴散，除咗出街要戴口罩，就係盡量避免群組聚集，所以好多僱主都要求僱員居家工作，務求將辦公室嘅感染機會減到最低。不過政府作為全港最大嘅僱主，明知疫情第三波來勢洶洶，偏偏就對公務員居家工作一事態度消極。雖然政府話要維持公共服務，但係幾個月前疫情爆發之初，政府都有實施居家工作，當時又唔見話擔心公共服務受阻喎，到底政府施行居家工作係憑乜嘢準則呢？公務員事務局局長聶德權睇嚟要解釋清楚好喎，否則的話好難服眾囉。