政情：年輕人中史認知空白 議員：政府要負責
早前有教師歪曲史實惹起極大爭議，立法會財務委員會尋日通過擴建科學館及歷史博物館項目，涉款逾七千萬元。喺審議期間，有議員認為年輕人對歷史嘅認知空白，而政府係需要負很大嘅責任，多名議員建議擴建後應該加強學生歷史教育。
通過擴建科學館歷史博物館
其實喺工務小組委員會早前審議呢個擴建項目時，都有唔少議員批評政府喺學生歷史教育不足，議員邵家輝喺尋日嘅財委會會議上更直指現時年輕人對自己國家嘅歷史認知係空白嘅，認為政府方面應負很大責任。
議員陳恒鑌亦話歷史博物館擴建工程，除硬件外，軟件同樣重要，希望局方確保歷史唔會被篡改同歪曲，要求設立機制確保歷史真確性。另一名議員陸頌雄就話歷史博物館目前介紹香港歷史篇幅不足，例如鴉片戰爭由來等，又建議樹立林則徐雕像及公園。
民政事務局副局長陳積志回應時話，局方會秉持專業、持平及客觀態度對待史實，並有專家顧問、學者等提供意見，同時有機制確保策展符合收藏原則，有信心可以把好關。
另有泛民議員則擔心將來博物館內展示嘅歷史內容或文字可能違反《港區國安法》，如談及六四事件等，詢問局方點樣處理呢啲歷史。陳積志就回應話「既要專業也不違法」，有需要會徵詢法律意見。