中環出更：享受天倫樂 沈慧林教囡囡唸唐詩
暑假將至，本來係舉家玩樂嘅好時機，然而疫情轉趨嚴峻，港人又再重返居家避疫嘅日子。香港中華總商會選任會董沈慧林（William），話早前嘅市面頗為熱鬧，停頓已久嘅商界活動紛紛恢復，一個星期佢就有四至五晚需外出應酬，誰知第三波疫情悄然掩至，依家收咗工返屋企嘅最佳節目，就係教囡囡唸唐詩。
William話之所以教囡囡唸唐詩，係藉此向下一代灌輸中華文化嘅精髓。其實佢童年時，爺爺就經常教佢唸唐詩同心經，因此佢自覺有責任，要將中華文化傳承落去。William憶起舊時，爺爺雖然會用閩南話嚟同佢溝通，但係教佢唸唐詩都係採用廣東話。後來佢都覺得，唸古代詩詞的確係要用廣東話先至押韻，難怪教囡囡唸唐詩只係教一兩次就琅琅上口。William話女仔多數比較文靜，但近日佢都買咗一張小型彈床，專供囡囡發洩精力咁話。
傳承父訓 楊哲安帶女兒訪外展校
中西區區議員楊哲安，早前就同四位千金到訪外展訓練學校。楊話佢爸爸就係外展訓練學校嘅第一屆學員，佢七歲就首次參與外展訓練學校嘅活動，而今年十一歲嘅長女，兩年前就開始參加外展訓練學校嘅課程，可謂三代傳承。楊指該校最長嘅一個課程有個壓軸項目，就係學員只得食水傍身之下，獨自喺荒島度過四十八小時，以鍛煉個人嘅堅忍能力。佢話早前同家人到塔門露營，然而有幾個營幕遭野豬摧毀，佢就將營幕嘅殘骸重新湊合，勉勉強強又喺野外度過一晚，真係對應變能力嘅一大考驗。所以佢相當鼓勵年輕人，參加外展訓練學校嘅活動。
中華廠商聯合會前會長施榮懷，先前就同大哥施榮怡，與父母、太太同埋自己嘅兩仔一女，一齊食日本餐。施榮懷話當日係子女請長輩食飯，雖然父母習慣上茶樓，不過兩老一聽聞孫仔孫女咁孝順，無論品嘗邊種菜式，個心都甜到漏啦。
卓妮