政情：龜速開發 乏地起屋 前高官凌嘉勤 賴冇「特效藥」

促本地設施搬到桂山島

凌嘉勤喺座談會上話棕地發展有利香港嘅可持續發展，但棕地發展實際操作艱難，難免會有人抗議；而「明日大嶼」計劃雖然係策略性投資，會有回報但要時間研究，對環境又唔可以有太大影響，所以要尋覓「框框之外」嘅可能性。佢仲話早前有聲音話應該發展境外水域，佢就建議將本地設施搬到桂山島，將本地空間留番畀房屋建設，又話新加坡都不斷填海增加土地，港府亦應該倣效喎。

議員斥開發新界冇成果

議員陳恒鑌就鬧爆政府，話政府喺三十年前提出發展新界東北用地，至今都未見成果，質疑政府開發過慢囉！佢又話葵涌因貨櫃碼頭船隻長期開動引擎，搞到當區空氣污染嚴重，加上碼頭貨運吞吐量連年下跌，話不如將貨櫃碼頭搬到桂山島啦！

其實凌嘉勤在任嘅時候已經提出好多增加土地供應嘅模式，包括大規模改造棕地創造發展容量，又曾經話大規模填海造地係無可避免。但提出幾多項建議又點呢？香港至今都唔夠土地起樓。至於佢話欠缺土地規劃係風涼話，睇吓新界東北發展拖咗咁多年，就已經說明一切喇！

另外，同場嘅建築、測量、都市規劃及園境界議員謝偉銓話本港增加房屋供應嘅執行度未如人意，形容房屋問題「路路不通、舉步艱難」，舉例話棕地發展容易被人話「官商勾結」、農地改為房屋發展容易涉及保育問題，建議政府喺香港水域以外，包括桂山島水域填海，將本地嘅貨櫃碼頭、監獄、大學科研樓等設施搬去島上，同樣支持運用香港境內原有嘅土地作房屋發展。

而中國銀行（香港）經濟及政策研究顧問謝國樑就假設桂山島水域填海五十平方公里，再以油尖旺區嘅人口密度作推算，認為填海後嘅桂山島可以容納一百五十萬人口。佢建議以房屋問題同中央商討租借桂山島作為香港未來三十年嘅發展基地，又話島上可考慮提供高增值服務業。