中環出更：在位時負評多 「吳得掂」教人咪認叻
人稱「吳得掂」的教育局前局長吳克儉，在任局長時備受批評。佢尋日出席活動時以唔同層次嘅領導技巧為題演講，教大家要謙虛學習，唔知佢當年做局長時又識唔識呢啲領導技巧呢？
吳得掂喺演講中提到新冠肺炎疫情近日再嚟一波，真係今日唔知聽日事，好多香港人都對前景無晒信心，但佢話鍾意向難度挑戰，因為面對困難同逆境，先至可以令佢哋人生更上一層次喎。
赴日睇紅葉 懶理學子
佢曾經講過希望退休後可「每個月睇番三十本書」，今日都同大家分享咗幾本對佢有影響力嘅書，最後仲教人一個好嘅領袖要保持謙虛，同埋唔好認叻搶功勞。
雖然佢無評論自己係咪一個好嘅領袖，但佢在任教育局局長時就多多負評，最先係捲入反國教風波，其後又面對有家長發起取消小學三年級TSA（全港性系統評估）嘅行動，佢備受外界批評，又曾因唔出席TSA公聽會，事後被指去咗日本睇紅葉等，被炮轟「唔夠班」，更被嘲為「吳得掂」。唔知呢啲問題係咪佢口中所講嘅向難度挑戰呢？
卓妮