中環出更：演講唔想口窒窒 林景昇：學嘢應趁早
相信每個人都試過口窒窒嘅情況，但如果喺重要場合或者見工時唔知講乜好就大鑊喇！傑出青年協會前主席林景昇 （Sean）試過演講失敗，之後再經努力後而獲獎，箇中嘅感受係乜嘢？佢話係學嘢要趁早喎。
阿Sean曾經講過喺當選傑青之後，先慢慢開始學習面對群眾講嘢，曾經喺一個輕鬆主題嘅演講上面講嘢冇人笑，最後三甲不入，後來佢努力練習咗四年後終於喺演講比賽上得獎！佢最大嘅感受係學嘢要趁早學，最好喺你成功同出名之前，因為佢就係當選完傑青之後先學演講，笑稱一開始都有偶像包袱（口架），後來先慢慢接受自己，所以佢成日都勉勵後生仔想學一樣嘢就要行動喇，趁自己事業未起步失敗都無咁樣衰嘛！
邱啓鴻會考中文口試得U
接納自己嘅不足對個人進步好重要，傑出青年協會另一名前主席余嫿（Mary）就話依家上台演講都係會好緊張，但最重要就係調整自己心態。Mary話望住台下聽眾嘅笑容，就算依家疫情人人戴口罩睇唔到個樣，只要聽到聽眾有反應、同自己有互動都會放下心頭大石。Mary從事設計行業，明白到要說服到人，令自己嘅演講有感染力嘅前提，首先要對你所講嘅嘢有興趣同深入了解。
同場仲見到全國十大傑出青年邱啓鴻（Wilson）同二○二○國際演講會南中國備稿演講及評論演講比賽總冠軍余定志。但點都諗唔到Wilson曾經係「黐脷筋」，佢自爆當年會考中文口試得U，即係最低嘅級別。佢話都係出嚟做嘢，加上拎咗全國傑青後，多咗好多機會要公開演講，說話技巧同自信都係咁慢慢練返嚟。佢認為每個人都有弱點，只要肯進步就得，佢用見工做例子，面試時僱主成日都鍾意問一個問題「講吓你嘅長處同弱處」，佢建議年輕人可以大方談及自己嘅弱處，只要話畀僱主聽有心去改善就足夠啦！
卓妮