團結就是力量，唔同機構合作做善事相信更加事半功倍。有三間非牟利機構攜手合作舉辦籌款活動，呼籲市民捐出政府派發嘅一萬元幫助有需要人士。其中一間機構凝動香港體育基金（凝動）創辦人黃梓謙（Gary）形容今次合作好難得，佢話大家理念相近，服務嘅都係基層學生，所以決定坐埋一齊，喺身心靈層面支援學生。

學習知識固然重要，凝動認為運動都不可或缺，所以一直以嚟向有需要嘅學生提供免費嘅體育班，除咗等佢哋鍛煉身體，仲可以透過運動培養正向思維。凝動總幹事江嘉惠（Judy）話疫情期間小朋友成日留喺屋企少咗郁動，有學生仲肥咗幾個碼搞到啲衫都唔啱着。機構認為抗疫係持久戰，所以持續請教練拍片教導簡單嘅運動，鼓勵小朋友喺屋企都要郁動吓。

慈善機構受疫情影響，未必可以如常執行工作。陳校長免費補習天地（補天）創辦人陳葒（陳校長）形容機構「不務正業」，話以往只係支援學生學習需要，但疫情下要幫有需要家庭搵口罩、搵平板電腦配合網上教學、甚至資助學生家庭去唔同地點郊遊，紓緩身心壓力。陳校長話唔止喺疫情下，平時都有學生面對情緒問題，機構義務導師同學生一對一補習嗰陣，同時會同學生傾偈，了解佢哋屋企嘅困難，再提供適當協助。

「擴充業務」嘅仲有良師香港，機構原本主要招募有心人去基層學校任教，照顧學生嘅學業同生涯規劃。但學校喺疫情下停課幾個月，創辦人陳君洋（Arnold）覺得基層學生困喺屋企缺乏照顧，安排老師逐個打電話畀學生了解佢哋嘅困難，同時成立情緒支援平台，畀學生傾訴煩惱。

卓妮