政情：暴疫煎熬 張宇人料3成食肆執笠
喺香港經營飲食業從來都唔容易，代表飲食界嘅議員張宇人就更指呢一行睇唔到遠景，前途並不樂觀，尤其是舊年嘅社會運動餘波未了，復又遇上疫情嘅衝擊，無論內地同外國嘅遊客都近乎絕迹，而單靠港人消費，好難撐得起本地二萬八千多間食肆，因此佢估計，將有三成食肆遭到淘汰。
斥有業主不理時艱加租
張宇人日前喺一個訪談節目中指出，幾千間食肆退出市場當然係令人難過，不過佢相信飲食業不濟，零售業亦唔會好景，當商場出現大量吉舖，業主就唔敢叫價太高，租金方面反而趨向穩定。張宇人批評舖位業主無視飲食業喺黑暴同疫情下艱苦經營，租金非但無下調，近日反而有進取嘅業主要求加租高達八成。佢又話舊年嘅社會運動，暴徒動輒惡意破壞，更有人藉政治立場來打擊競爭對手，佢認為社會一日未回復平靜，投資飲食業就真係要好小心喇。至於今次疫情，佢相信冇咁容易斷尾，而就算疫情完結，食肆都要嘗試用布簾或屏風來做好分隔措施，同埋要重新思考生意模式，佢話當今嘅市道，食肆規模愈大，損傷就愈嚴重。