政情：泛民杯葛內會冇蒲頭 高官有位竟然唔識上

「商討民生最好時間」 無現身解畫

因應新冠肺炎疫情，政府早前話會同粵港澳三地搞「健康碼」，但遲遲都未出台，議員喺內會都鬧過唔少，甚至要求有官員出席解畫，但點知幾次都唔出現。尋日議員何俊賢批評政府判斷失誤，話依家民主派議員缺席，係商討民生嘅最好時間，批評政府「捉到鹿但唔識脫角」。

議員梁志祥都話對此好失望，認為今屆立法會會期就快屆滿，但仲有好多問題，官員已冇機會再出席會議解畫，認為部分高官唔應該只係匿喺辦公室。後來內會主席李慧琼解釋，政務司司長張建宗係好願意出席內會，但因為尋日已經有另一個會議討論健康碼，為免重複所以就唔去內會喇。