政情：等政府開位 市民聽乞米

分兩年聘請 議員轟太慢

立法會公務員及資助機構員工事務委員會尋日開會，跟進第二輪防疫抗疫基金下，有關推行創造職位計劃及技能提升配對資助計劃兩項措施嘅進展。議員邵家輝表示，雖然覺得職位嘅範疇好多元，但係政府做嘢嘅速度就有待改善喇。邵直指，依家真係好多人冇工開，雖然政府文件話會喺未來兩年分階段推出兩萬幾個職位，但佢強調市民當下需要嘅係即刻推出，而唔係分階段囉。咁又係嘅，遠水不能救近火，唔好講係兩年後，咁嘅時勢，市民兩個月都唔知捱唔捱到。

網站設計差 學歷要求高

議員鄭泳舜就直斥防疫抗疫基金推出至今已經三個月，但就只請咗七百人，呢個比例相對於整體創造三萬個有時限職位嚟講真係太少喇，並狠批「依家抗疫就係要快、要即刻有，而唔係下年先請，咁真係好難收貨」。鄭又話，有街坊同佢呻，想申請政府推出嘅職位，但又無從入手，咁鄭之後有幫個街坊上局方網站搵吓計劃嘅請人資訊啦，點知聘請資訊頁面好難搵，而且適合低學歷申請人嘅職位非常之少，批評網站嘅請人資訊好隱蔽，覺得應該要設計到易啲畀人搵到。

聶德權：請人告示會更顯眼

聶德權回應話同意鄭嘅建議，會諗吓點將請人告示擺喺當眼處，又指政府已採用中央招聘形式請人，加快咗請人流程。原來加快速度就係三個月只請得七百人，估唔到市民想搵份工靠勞力賺錢都咁難，反而商界企業填份表就迅速攞到政府嘅保就業計劃津貼，政府個零月已批出二百九十六億元津貼。失業人士旨意政府救命，真係蛇都死啦。